စပ်ဆေးဆိုတာရပ်ကွက်တွေထဲကဆေးဆိုင်အများစုမှာ ရောဂါလက္ခဏာကို အမြန်သက်သာအောင် ဆရာဝန်မဟုတ်သောသူများမှ ဆေးတွေကို ပေါင်းစပ်ပြီး နှစ်ရက်သုံးရက်စာ ရောင်းပေးလိုက်တာမျိုးပါပဲ။အဆင်သင့်စပ်ပြီးသား ဆေးအထုပ်တွေထုပ်ပြီး ရောင်းကြတာမျိုးတွေတောင် ရှိပါတယ်။

စပ်ဆေးအများစုမှာ အကိုက်အခဲပျောက်ဆေး၊ စတီးရွိုက်၊ အပြင်းစားအရောင်ကျဆေး၊ အဖျားကျဆေး၊ ဝမ်းပိတ်ဆေး၊ ပိုးသတ်ဆေး၊ ချောင်းဆိုးပျောက်ဆေး၊ အားဆေးတွေ ပါတတ်ပါတယ်။

ဒီလိုဆေးအပြင်းတွေကြောင့် အစာအိမ်ထိတာ၊ ကျောက်ကပ်ထိလာတာ၊ အရိုးပွလာတာတွေ အဖြစ်များလာပါတယ်။

စပ်ဆေးတွေဟာ ဆေးကဒ်နဲ့မဟုတ်ဘဲ အလုံးပြုတ်တွေဆိုတော့ ဆေးအမျိုးအစား၊ သက်တမ်းလွန်/မလွန်ကို သေချာမသိနိုင်တာ၊ မှတ်ပုံတင်မထားတဲ့ ဆေးမျိုးတွေ၊ ကိုယ်နဲ့မတည့်တဲ့ဆေးတွေ ပါနေမှာမျိုးကို ဘာမှ သေချာ မသိရပြန်ပါဘူး။

အဆိုးဆုံးတစ်ခုက စတီးရွိုက်ဆေး အပြင်းစားတွေပါပဲ … သောက်လိုက်တာနဲ့ ရောင်ရမ်းနေတာ၊ နာကျင်နေတာစတဲ့ ဝေဒနာအတော်များများကို ချက်ချင်းသက်သာ သွားစေပေမယ့် ထိန်းညှိပြီး မသုံးတတ်ရင် ဆိုးကျိုးတွေက အလွန်ကိုများပြီး အသက်အန္တရာယ်အထိပါ ပေးတတ်တဲ့ ဆေးမျိုးတွေဆိုတာကို သတိပြုသင့်ပါတယ်။

ရောဂါတစ်ခုခု၊ ဝေဒနာတစ်ခုခု ခံစားရတယ်ဆိုရင် ချက်ချင်းသက်သာဖို့ပဲ အဓိကမထားသင့်ပါဘူး။

တတ်ကျွမ်းနားလည်တဲ့ ဆရာဝန်နှင့်တိုင်ပင်ပါ။

ဆေးဝါးနှင့် ပတ်သက်ရင် ဆေးဝါးပညာရှင်(𝐏𝐡𝐚𝐫𝐦𝐚𝐜𝐢𝐬𝐭𝐬)များကို မေးမြန်းပါ။

ကိုယ်တိုင်ရော၊ ကိုယ့်မိတ်ဆွေထဲမှာရော ဒီလိုမျိုး ဆရာဝန်မညွှန်တဲ့ဆေးတွေ၊ စပ်ဆေးတွေကို အလွယ်တကူ သုံးနေတာမျိုးရှိရင် မလုပ်သင့်ကြောင်းပြောပြပေးပါနော်

အမြန်ပျောက်ချင်လို့၊ ငွေကုန်သက်သာချင်လို့ဆိုတဲ့ အကြောင်းအမျိုးမျိုးနဲ့ စပ်ဆေးတွေကို အသက်နဲ့ရင်းပြီး သောက်နေရမှာကို သတိပြုပြီး ရှောင်ကြဥ်နိုင်စေဖို့ မျှဝေလိုက်ရပါတယ် …