ဆောင်းရာသီ ရောက်ပြီဆိုရင် အအေးဒဏ်ကို ခံစားရသလို၊ အသားအရေ ခြောက်သွေ့တာ၊ ယားယံတာ၊ အဖတ်လန်တာတွေနဲ့လည်း ရင်ဆိုင်ရတတ်ပါတယ်။ ဆောင်းတွင်းမှာ အသားအရေ ဘာကြောင့် ခြောက်သွေ့ရသလဲ၊ ဘယ်လို ဂရုစိုက်သင့်သလဲဆိုတာ ဝေမျှပေးချင်ပါတယ်။
အသားအရေ ခြောက်သွေ့ရခြင်းရဲ့ အဓိက အကြောင်းရင်းများကတော့
၁။ လေထု စိုထိုင်းဆ နည်းပါးခြင်း
ဆောင်းတွင်းလေဟာ ပုံမှန်ထက် ပိုမိုခြောက်သွေ့ပါတယ်။ လေထုထဲမှာ အစိုဓာတ် နည်းပါးလာတဲ့အခါ ကျွန်ုပ်တို့ရဲ့ အသားအရေက အစိုဓာတ်တွေကို လေထဲကို ပိုမိုဆုံးရှုံးရပါတယ်။
၂။ ရေပူနဲ့ ရေချိုးခြင်း
အေးတဲ့အခါ ရေနွေးပူပူနဲ့ ရေချိုးတာဟာ သက်သာသလို ခံစားရပေမယ့်၊ ရေပူဟာ အသားအရေရဲ့ သဘာဝ အဆီ (Natural Oils) တွေကို ဖယ်ရှားလိုက်တာကြောင့် ရေချိုးပြီးရင် အသားအရေကို ပိုမိုခြောက်သွေ့စေပါတယ်။
၃။ ဂရုမစိုက်မိခြင်း
နှုတ်ခမ်း၊ လက်၊ ခြေထောက်တို့လို ခန္ဓာကိုယ်အစိတ်အပိုင်းတွေအတွက် အကာအကွယ် (ဥပမာ- လက်အိတ်၊ နှုတ်ခမ်းအဆီ ၊ ခရင်မ်) မသုံးတာ၊ ရေဓာတ် မလုံလောက်တာတွေကလည်း အသားခြောက်တာကို ဖြစ်စေပါတယ်။
ဒါဆိုဆောင်းတွင်း အသားအရေ ဘယ်လိုထိန်းသိမ်းကြမလဲ??
၁။ အစိုဓာတ် ဖြည့်ပေးပါ
ရေချိုးပြီး သိပ်မခြောက်သေးတဲ့ အသားအရေပေါ်ကို Body Lotion/Cream ကို ချက်ချင်းလိမ်းပေးပါ။ မျက်နှာအတွက်လည်း Moisturizer/Face Cream ကို မဖြစ်မနေ လိမ်းပေးပါ။ ဆောင်းတွင်းမှာ ပုံမှန်သုံးနေကျ Lotion ထက် ပိုပြီး အစိုဓာတ်များတဲ့ Lotion ကို ရွေးချယ်သင့်ပါတယ်။
၂။ ရေနွေးနွေးလေးနဲ့သာ ချိုးပါ
အရမ်းပူတဲ့ရေနဲ့ ရေချိုးခြင်းကို ရှောင်ပါ။ ရေနွေးနွေးလေး နဲ့သာ ချိုးပြီး ရေချိုးချိန်ကိုလည်း (၅ မိနစ်မှ ၁၀ မိနစ်) လျှော့ချသင့်ပါတယ်။
၃။ ရေဓာတ် ဖြည့်တင်းပါ
ခန္ဓာကိုယ် အတွင်းပိုင်းကနေ ရေဓာတ် လုံလောက်စွာရရှိဖို့ ရေများများ သောက်သုံး ပေးပါ။ ရေဟာ အသားအရေ ကျန်းမာရေးအတွက် အရေးကြီးဆုံးပါ။
၄။ လေထု စိုထိုင်းဆ မြှင့်တင်ပါ
အိပ်ခန်း (သို့) အချိန်ကြာကြာနေတဲ့အခန်းထဲမှာ Humidifier (လေထုအစိုဓာတ်ထိန်းစက်) ကို အသုံးပြုပေးရင် လေထုထဲမှာ အစိုဓာတ်ကို ထိန်းထားပေးနိုင်ပါတယ်။
၅။ နူးညံသော Cleanser များ ရွေးချယ်ပါ
အသားအရေကို ခြောက်သွေ့စေတဲ့ ပြင်းထန်တဲ့ ဆပ်ပြာ (သို့) မျက်နှာသစ်ဆေး တွေအစား အစိုဓာတ်ကို မဖယ်ရှားတဲ့ (Gentle) အမျိုးအစားကို သုံးပေးပါ။
၆။ နှုတ်ခမ်းနှင့် လက်ကို ဂရုစိုက်ပါ
နှုတ်ခမ်းခြောက်တာ မဖြစ်အောင် Lip Balm ကို အမြဲ ဆောင်ထားပြီး လိမ်းပါ။ Hand Cream လိမ်းပေးတာတွေ လုပ်သင့်ပါတယ်။
၇။ အဆီ (Oils) များ အသုံးပြုခြင်း
သံလွင်ဆီ (Olive Oil)၊ အုန်းဆီ (Coconut Oil) လိုမျိုး သဘာဝဆီ တစ်မျိုးမျိုးကို အသားအရေပေါ် ညင်သာစွာ နှိပ်နယ်ပေးတာက ခြောက်သွေ့တဲ့ အသားအရေကို အစိုဓာတ် ကောင်းစွာ ဖြည့်ပေးနိုင်ပါတယ်နော်။
