မြန်မာနိုင်ငံမှာ မိုးရာသီနှောင်းပိုင်းကနေ ဆောင်းရာသီအကူးအပြောင်းကာလ (အထူးသဖြင့် အောက်တိုဘာလ/နိုဝင်ဘာလမှစ၍) ဟာ ရာသီဥတု အပြောင်းအလဲကြောင့် လူအများစုဟာ တုပ်ကွေးရောဂါ (Influenza) အလွယ်တကူ ကူးစက်ခံရနိုင်တဲ့ အချိန်ဖြစ်ပါတယ်။

တုပ်ကွေးဆိုတာ ဘာလဲ?

တုပ်ကွေးရောဂါဆိုတာ Influenza Virus ကြောင့် ဖြစ်ပွားတဲ့ အသက်ရှူလမ်းကြောင်းဆိုင်ရာ ဗိုင်းရပ်စ် ကူးစက်ရောဂါတစ်မျိုး ဖြစ်ပါတယ်။ သာမန် အအေးမိဖျားနာခြင်း (Common Cold) ထက် လက္ခဏာတွေက ပိုမိုပြင်းထန်တတ်ပြီး နောက်ဆက်တွဲ ဆိုးကျိုးတွေလည်း ဖြစ်ပေါ်နိုင်ပါတယ်။

တုပ်ကွေးဗိုင်းရပ်စ်ဟာ အဓိကအားဖြင့်…

1. လေထဲမှတစ်ဆင့်: တုပ်ကွေးဖြစ်နေသူ ချောင်းဆိုးခြင်း၊ နှာချေခြင်းတို့ကြောင့် လေထဲကို ပျံ့နှံ့လာတဲ့ ဗိုင်းရပ်စ်ပါတဲ့ အမှုန်အမွှားတွေကို ရှူရှိုက်မိခြင်း။

2. ထိတွေ့မှုမှတစ်ဆင့်: ဗိုင်းရပ်စ်ပိုး ကပ်ငြိနေတဲ့ လက်ကိုင်ပုဝါ၊ တံခါးလက်ကိုင်၊ ဖုန်းစတဲ့ အရာဝတ္ထုတွေကို ကိုင်တွယ်မိပြီးနောက် မျက်လုံး၊ နှာခေါင်း၊ ပါးစပ်တို့ကို လက်နဲ့ ထိမိရာမှတစ်ဆင့် ကူးစက်နိုင်ပါတယ်။

တုပ်ကွေးဗိုင်းရပ်စ် ကူးစက်ခံရပြီး ၁ ရက်မှ ၄ ရက် အတွင်း ရောဂါလက္ခဏာတွေ စတင်ပေါ်ပေါက်လာနိုင်ပါတယ်။ လက္ခဏာများသည် သာမန်အအေးမိခြင်းထက် ပိုပြင်းထန်ပြီး ရုတ်တရက် ဖြစ်လေ့ရှိပါတယ်။

· အဖျားကြီးခြင်း (39°C မှ 40°C အထိ) နှင့် ချမ်းတုန်ခြင်း

· ခေါင်းကိုက်ခြင်း

· ကြွက်သား/ကိုယ်လက်များ နာကျင်ကိုက်ခဲခြင်း

· အလွန်အမင်း အားနည်းခြင်း၊ မောပန်းနွမ်းနယ်ခြင်း

· ချောင်းဆိုးခြင်း (အများအားဖြင့် ချောင်းခြောက်ဆိုးခြင်း)

· လည်ချောင်းနာခြင်း

· နှာရည်ယိုခြင်း သို့မဟုတ် နှာပိတ်ခြင်း

· အချို့ ကလေးများနှင့် လူကြီးများတွင် ပျို့အန်ခြင်း၊ ဝမ်းလျှောခြင်းများ ဖြစ်ပေါ်နိုင်ပါသည်။

အသက်ငယ်သူ၊ သက်ကြီးရွယ်အို၊ ရောဂါအခံရှိသူများနှင့် ကိုယ်ဝန်ဆောင်များသည် တုပ်ကွေးဖြစ်ပါက ရောဂါပိုမိုပြင်းထန်နိုင်သောကြောင့် ဆရာဝန်နှင့် အမြန်ဆုံး ပြသ စစ်ဆေးသင့်ပါသည်။